A unidade xerencial constitúe unha das estruturas fundamentais do modelo de Centro Comercial Aberto. A súa función é garantir a continuidade profesional da entidade e transformar as liñas estratéxicas definidas pola Xunta Directiva en proxectos, servizos e actuacións concretas para o comercio local.

A Dirección Xerencia de Estrela de Marín está encabezada por Yonathan Carreira Figueiras, vinculado profesionalmente ao proxecto desde a creación do CCA en 2006. A súa traxectoria suma, polo tanto, dúas décadas de experiencia na xestión, dinamización e modernización do comercio urbano.

Ao longo deste período, a unidade xerencial acompañou a evolución de Estrela de Marín desde a posta en marcha do modelo de Centro Comercial Aberto ata a actual estrutura, baseada na actividade comercial permanente, a fidelización, a innovación, a transformación dixital e a cooperación institucional.

A experiencia profesional da Xerencia transcende ademais o ámbito local. En 2020, Yonathan Carreira foi elixido presidente da Asociación Galega de Xerentes de Centros Comerciais Abertos, participando tamén en estruturas de representación e colaboración do comercio urbano a nivel galego e estatal. Ademais, ten experiencia como árbitro de Consumo da Xunta de Galicia e como titor das prácticas de FCT de ciclos superiores e medios, nas últimas dúas décadas.

Entre as principais funcións da unidade xerencial atópanse a planificación e execución das campañas de dinamización, a atención e coordinación cos establecementos asociados, a captación e xestión de financiamento público, a preparación de subvencións e convenios, a interlocución coas administracións, a coordinación de provedores, a organización de eventos, a comunicación, a innovación tecnolóxica e o desenvolvemento de novas ferramentas de fidelización e servizos.