O alumnado do Colexio Mendiño de FP de Vigo colaborará coa campaña “Vive un Verán Estrela” decorando escaparates do comercio local

Dentro da campaña “Vive un Verán Estrela”, o Centro Comercial Aberto Estrela de Marín desenvolverá este xoves 4 de xuño unha acción especial de colaboración co Colexio Mendiño de FP de Vigo, coa participación de 23 alumnos e alumnas do Ciclo de Actividades Comerciais.

Durante a xornada, o alumnado desprazarase ata Marín para traballar nos escaparates de varios establecementos asociados, baixo a dirección da especialista en visual merchandising Cany Juncal. A iniciativa ten como obxectivo mellorar a presentación visual dos comercios, reforzar a imaxe da campaña de verán e converter os propios establecementos nun espazo de aprendizaxe práctica.

Esta acción permite unir formación profesional e comercio local, ofrecendo ao alumnado a oportunidade de aplicar os seus coñecementos nun contexto real, ao tempo que os establecementos reciben unha proposta creativa e profesional para facer máis atractivos os seus escaparates.

Desde Estrela de Marín considérase que o escaparate segue sendo unha ferramenta fundamental para captar a atención da clientela, transmitir identidade e poñer en valor os produtos e servizos do comercio de proximidade. Por iso, esta colaboración encaixa plenamente coa filosofía da campaña “Vive un Verán Estrela”, que busca dinamizar as compras, xerar movemento nas rúas e reforzar o papel do comercio local como motor económico e social da vila.

A actividade desenvolverase respectando a identidade de cada establecemento participante e adaptando as propostas visuais ás características de cada negocio, coa finalidade de crear escaparates atractivos, funcionais e vinculados ao espírito do verán.

Con esta iniciativa, Estrela de Marín continúa apostando por accións innovadoras, colaborativas e participativas, capaces de achegar novas miradas ao comercio local e de crear experiencias que conecten coa cidadanía.